Utzidazu Lekua gailu eramangarrietan jokatzeko bideojokoa da, edukiak modu dinamiko eta atseginean irakasteko aproposa delako eta ikasketa edozein toki, momentu eta testuinguruan aurrera eramatea errazten duelako.

Plataforma eta Sandbox joko motak elkartzen dituen bideojokoa da, landu nahi diren gaiei lotutako galderak dauzkana.
Jokalariak sei eszenatoki ezberdinetan egin behar du aurrera oztopo fisikoak ekidinez, salto eginez, eskalatuz… Bere ibilbidean oztopo diren erasotzaileak eta mezu bortitzak botatzen dituzten sare puxikak suntsitu behar ditu eta giro ona eragiten dutenak harrapatu ditzake puntuak lortzeko. Bideojokoen, sare sozialen eta mezularitza plataformen bidez, gauden tokian gaudela, jasotzen dugun eduki eta mezu-zaparrada irudikatzen dute erasotzaileak. Eta kaltegarriak direnak desagerraraziz, ziberbizikidetza positiboa sustatzen dela adierazi nahi da metaforikoki.
Jokalariak eszenatokia eraikitzeko elementuak lor ditzake: plataformak, eskailerak, igogailuak... Eta eszenatokia osatzeko, lortutako elementu hauek edozein tokian ezarri ahal izango ditu, baita mugitu ere.